«Мы будзем надаваць увагу прафіляктыцы побытавых злачынстваў, узмацненьню кантролю за асобамі, якія знаходзяцца на розных уліках, а таксама адпрацуем месцы масавага адпачынку і масавага знаходжаньня грамадзян», — паведаміў начальнік упраўленьня аховы правапарадку і прафіляктыкі Сяргей Гарохаў на прэсавай канфэрэнцыі ў Менску.
Прадстаўнік менскай міліцыі заклікаў грамадзян адмовіцца ад выкарыстаньня ўласнага транспарту і загадзя прыходзіць на мерапрыемствы, паколькі трапіць на сьвяточныя пляцоўкі можна будзе толькі праз кантрольна-прапускныя пункты (КПП), дзе іх будуць даглядаць і правяраць на наяўнасьць забароненых прадметаў.
Асноўныя мерапрыемствы адбудуцца каля Палацу спорту, Нацыянальнай бібліятэкі, а таксама каля стэлы «Менск — горад-герой».
Паводле Сяргея Гарохава, найбольш грамадзян чакаюць каля стэлы, таму там уладкуюць найбольш — 15 — пунктаў для пропуску і дагляду грамадзян.
Прадстаўнік менскай міліцыі зьвярнуў увагу на тое, што для праносу на мерапрыемствы забароненыя зброя, колюча-рэжучыя прадметы, выбуховыя рэчывы и прылады, шкляная тара, «рознага кшталту прадметы, якімі можна нанесьці цялесныя пашкоджаньні або муляжы пералічаных прадметаў».
Апроч таго, на мерапрыемствы грамадзянам забаранілі прыходзіць з роварамі, скутэрамі, самакатамі і сабакамі. Выключэньні зрабілі для сабак, якія суправаджаюць людзей з страчаным зорам.
Паводле Гарохава, у месцах усіх КПП будуць абсталяваныя месцы захоўваньня для рэчаў, якія забаронена праносіць на масавыя мерапрыемствы.
«Дапускаюцца для праносу традыцыйна безалькагольныя напоі ў плястыкавай празрыстай тары аб’ёмам да паўлітра», — дадаў прадстаўнік менскай міліцыі.
Форум